हिन्दु र इस्लाम धर्मगुरु एउटै रथमा

बाँके, माघ १० – बाँकेको खजुरामा हिन्दु र इस्लाम धर्मगुरुलाई एकसाथ रथमा बजार परिक्रमा गराएर धार्मिक सद्भावको उदाहरण दिइएको छ । धार्मिक सद्भावका हिसावले अति महत्वपूर्ण बाँकेको बागेश्वरी गाविसको खजुरामा सोमबारदेखि सुरु व्यापारिक महोत्सवको उद्घाटनअघि धर्मगुरुलाई एकसाथ रथ परिक्रमा गराइएको हो ।
बागेश्वरी गाविस कार्यालयसँगै जोडिएको मुसबेटवा बाबा मजारमा सोमबार सामाजिक र धार्मिक सद्भाव झल्किने प्रस्तुतीसँगै महोत्सवको उद्घाटन भएको हो । महोत्सवको उद्घाटनअघि हिन्दु धर्मागुरु चन्द्रनाथ योगी र इस्लाम धर्मगुरु मौलाना जव्वार मञ्जरीलाई रथमा एकसाथ राखेर खजुराबजार परिक्रमा गराइएको थियो ।
सामाजिक र धार्मिक सद्भावको जिल्लाव्यापीरुपमा प्रचारप्रसारका लागि धर्मगुरुलाई एकसाथ रथमा घुमाएर परिक्रमा गराइएको आयोजक आधुनिक युवा सञ्जाल डिगाउँका अध्यक्ष तीलकवीर सुनारले जानकारी दिनुभयो । महोत्सव आयोजनास्थल पनि हिन्दु र मुस्लिम धर्मावलम्बीहरुको सद्भावको प्रतीक हो ।
‘मुसबेटवा मजारमा हिन्दु र मुस्लिम धर्मावलम्बीहरुले उत्तिकै आस्था र सम्मान राख्ने गरेका छन्, महोत्सवको आम्दानीको केही रकम मजार स्तरोन्नतीका लागि खर्च गर्ने तयारी छ’ आयोजक सञ्जालका अध्यक्ष सुनारले भन्नुभयो, ‘मुसबेटवालाई राष्ट्रिय र अन्तर्राष्ट्रियरुपमा चिनाउने अवसर पनि महोत्सव हो ।’
कृषि, पर्यटन प्रर्वद्धन, सांस्कृतिक एवं ऐतिहासिक धार्मिक मुसबेटवा बाबा प्रथम ब्यापारिक महोत्सव माघ २१ गतेसम्म सञ्चालन गरिनेछ । हरेक वर्ष श्रीपञ्चमीका अवसरमा लाग्दै आएको तीनदिने धार्मिक मेला पनि यसवर्ष महोत्सवसँगै हुने भएको छ । महोत्सवमा १ सय ७० वटा स्टल राखिएको आयोजक सञ्जालले जनाएको छ ।
‘कृषि, औद्योगिक तथा पर्यटकीय क्षेत्रको विकास तथा प्रर्वद्धन गर्दै आर्थिक वृद्धि तथा विकास गर्ने महोत्सवको लक्ष्य हो’ आयोजक समितिका अध्यक्ष सुनारले भन्नुभयो, ‘यसबाहेक स्वदेशी उत्पादनहरुको निर्यात प्रर्वद्धन एवम आन्तरिक बजार सुदृढ पार्दै आयात प्रतिस्थापन गरेर यस क्षेत्रकै कृषि उद्योग र पर्यटनको विकासमा सहयोग हुनेछ ।’
झण्डै ६० लाख रुपैयाँको कारोबार हुने अपेक्षा राखिएको महोत्सव ७० हजारभन्दा बढी मानिसले अवलोकन गर्ने अनुमान गरिएको छ । बाँके क्षेत्र नम्बर ४ बाट निर्वाचित सांसद दलबहादुर सुनारले भव्य समारोहकाबिच सोमबार महोत्सवको उद्घाटन गर्नुभयो ।