पूर्वराष्ट्रपति याह्या जमेहले देश छाडेसँगै गाम्बियाको राष्ट्रिय ढुकुटीबाट ११ मिलियन डलर भन्दा बढी पैसा गायब भएको वर्तमान राष्ट्रपति अदमा बारोका सल्लाहकारले बताएको बीबीसीले जनाएको छ ।

ती अधिकारीहरुले बित्तिय बिज्ञहरुले सो घाटाको मूल्यांकन गरिरहेको बताएका छन् । समाचारमा राष्ट्रिय ढुकुटी रित्तो रहेको र कुनै पैसा नभएको बताइएको छ ।

समाचारअनुसार लक्जरी कार तथा अन्य आइटमहरु जमेहले देश छाड्ने बेला  चादको एक कार्गो विमानमा लोड गरिरिहेको देखिएको थियो । २२ बर्षे शासनपछि जमेह शनिबार निर्वासनमा गएका थिए ।

गत डिसेम्बरमा चुनाव हारे पनि परिणाम अस्वीकार गरेका थिए । उनलाई पश्चिमी अफ्रिकी देशको संगठनका नेताहरुले सत्ता त्याग्न भनेपछि उनले सत्ता त्याग्दै निर्वासनमा जाने निर्णय लिएका थिए । उनी गिनीमा निर्वासनमा रहेको बताइएको छ ।  हाल छिमेकी देश सेनेगलमा रहेका नयाँ राष्ट्रपति बारो कहिले देश फर्कने भन्ने थाहा हुन सकेको छैन ।
तर पश्चिम अफ्रिकी देशका सेनाहरु बारोलाई देश फर्कने तयारीको वातावरण बनाउन गाम्बियाको राजधानी बन्जुलमा पुगेको बताइएको छ ।